তোমাৰ হাঁহিৰ অনুৰাগ
তোমাৰ হাঁহিৰ অনুৰাগ
 |
| © Image:Maina Gam |
তোমাৰ ওঁঠৰ এটি মিঠা হাঁহিত যদি
মোৰ মৰুভূমিৰ দৰে উকা চকুত
একাজলি ৰঙীন জোনাক উপচি পৰে,
তেন্তে সেই হাঁহিটি হৈ তুমি থাকি যোৱা—
মোৰ আকাশৰ চিৰস্থায়ী ধ্ৰুৱতৰা।
যদি মোৰ এই পলকহীন দৃষ্টিত
তোমাৰ সপোনবিলাক জীৱন্ত হৈ উঠে,
আৰু হৃদয়ৰ নিভৃত কোণত বাঢ়ি আহে
এক বুজাব নোৱাৰা প্ৰেমৰ মাদকতা,
তেন্তে মোক সেই মায়াৱী চকুহাললৈ
অবিৰাম চাই থাকিবলৈ দিয়া।
আৰু মোৰ উপস্থিতিয়ে যদি
তোমাৰ প্ৰতিটো উশাহত কঢ়িয়াই আনে
বসন্তৰ সেই মতলীয়া মলয়াৰ সুবাস,
তেন্তে মোক তোমাৰ ছাঁ হৈ
কাষতে ৰৈ যাবলৈ দিয়া— চিৰদিন।
©™ মাইনা গাম
